شىزاڭنىڭ مائارىپ تارماقلىرى‹‹14–مارت››ۋەقەسىدە زىيانغا ئۇچرىغان ئائىلىلەردىكى ئوقۇغۇچىلارغا ياردەم بەردى

  شىنخۇا ئاگېنتلىقى، لاسا خەۋىرى. مۇخبىرنىڭ شىزاڭ ئاپتونوم رايونلۇق مائارىپ نازارىتىدىن ئىگىلىشىچە، مائارىپ تارماقلىرى يېقىندا ‹‹14 – مارت›› ۋەقەسىدە زىيانغا ئۇچرىغان ئائىلىلەردىكى ئوقۇغۇچىلارغا ياردەم بېرىش توغرىسىدا سىياسەت چىقارغان. 

     تونۇشتۇرۇلۇشىچە، ياردەم بېرىلىدىغان ئوقۇغۇچىلار جەزمەن ئۈچ شەرتنى ھازىرلىشى، يەنى ‹‹14 – مارت›› ۋەقەسىدە زىيانغا ئۇچرىغان ئائىلىدىكى ئوقۇغۇچى بولۇشى؛ سودا – سانائەتنى مەمۇرىي باشقۇرۇش ياكى خەلق ئىشلىرى تارماقلىرىنىڭ ئېتىراپ قىلىشىدىن ئۆتكەن ھەم  ئېتىراپنامىگە ئېرىشكەن بولۇشى؛ ئاپتونوم رايون تەۋەسىدىكى ھەر دەرىجىلىك مەكتەپلەردە ئوقۇۋاتقان بولۇشى كېرەك ئىكەن.

     شەرتكە ئۇيغۇن كېلىدىغان ئوقۇغۇچىلار تۆۋەندىكىلەردىن بەھرىمەن بولىدۇ: مەجبۇرىيەت مائارىپى باسقۇچىدىكى ئوقۇغۇچىلارغا مۇناسىۋەتلىك بەلگىلىمە داۋاملىق ئىجرا قىلىنىپ، ئۇلار پۈتۈنلەي ھەقسىز ئوقۇتۇشتىن بەھرىمەن بولىدۇ؛ تولۇق ئوتتۇرا مەكتەپ ئوقۇغۇچىلىرىغا مۇناسىۋەتلىك بەلگىلىمە بويىچە ھەر بىر ئوقۇغۇچىغا ئايدا 90 يۈەن تۇرمۇش ياردەم پۇلى بېرىلىدۇ؛ ئوتتۇرا كەسپىي تېخنىكوم ئوقۇغۇچىلىرىغا مۇناسىۋەتلىك بەلگىلىمە بويىچە ئوقۇش خىراجىتى، ياتاق ھەققى قاتارلىقلارنى كەچۈرۈم قىلىش سىياسىتى يولغا قويۇلىدۇ ھەم ھەر بىر ئوقۇغۇچىغا ئايدا 150 يۈەن تۇرمۇش ياردەم پۇلى بېرىلىدۇ؛ تولۇق كۇرس، مەخسۇس كۇرس ئوقۇغۇچىلىرىغا مۇناسىۋەتلىك بەلگىلىمە بويىچە ئوقۇش خىراجىتى، ياتاق ھەققىنى كەچۈرۈم قىلىش سىياسىتى يولغا قويۇلىدۇ ھەم ھەربىر ئوقۇغۇچىغا ئايدا 200 يۈەن تۇرمۇش ياردەم پۇلى بېرىلىدۇ. مەكتەپ تەكشۈرۈپ ئېنىقلىغاندىن كېيىن ئوقۇغۇچىلارنىڭ ماتېرىيالىنى يۇقىرى دەرىجىلىك مائارىپ مەسئۇل تارمىقىغا يوللايدۇ، ئاندىن شىزاڭ ئاپتونوم رايونلۇق مائارىپ مەمۇرىي تارمىقى مەبلەغنى بىر تۇتاش ئاجرىتىدۇ.