خۇ جىنتاۋ، ۋېن جياباۋ چىڭداۋ–جىنەن تۆمۈر يولىدا يۈز بەرگەن پەۋقۇلئاددە ئېغىر قاتناش ھادىسىسى توغرىسىدا مۇھىم يوليورۇق بەردى
شىنخۇا ئاگېنتلىقى، بېيجىڭ، 28 - ئاپرېل تېلېگراممىسى. بۈگۈن ئەتىگەن سائەت 4 تىن 48 مىنۇت ئۆتكەندە، بېيجىڭدىن چىڭداۋغا ماڭغانT195 - قېتىملىق يولۇچىلار پويىزى چىڭداۋ - جىنەن لىنىيىسىنىڭ جۇسۇن رايونى بىلەن ۋاڭسۇن بازىرى ئارىلىقىدىكى بۆلەككە كەلگەندە، كەينى تەرەپتىكى 9 - ۋاگوندىن 17 - ۋاگونغىچە بولغان ۋاگونلىرى رېلىستىن چىقىپ كېتىپ، يەنتەيدىن شۈجۇغا ماڭغان 5034 - قېتىملىق يولۇچىلار پويىزى بىلەن سوقۇلۇپ، يولۇچىلار پويىزىنىڭ پاراۋوزى ۋە بەش ۋاگونىنى رېلىستىن چىقىرىۋېتىپ، ئېغىر تالاپەت كۆرۈلدى. خەۋەر ئېلان قىلىنغانغا قەدەر 70 كىشى قازا قىلدى، 416 كىشى يارىلاندى، يارىلانغانلار ئىچىدە تۆت فرانسىيىلىك ساياھەتچى بار.
ھادىسە يۈز بەرگەندىن كېيىن، پارتىيە مەركىزىي كومىتېتى، گوۋۇيۈەن يۈكسەك ئەھمىيەت بەردى، باش شۇجى خۇ جىنتاۋ، زۇڭلى ۋېن جياباۋ دەرھال جىددىي يوليورۇق بېرىپ، يارىلانغانلارنى پۈتۈن كۈچ بىلەن قۇتقۇزۇش، قازا قىلغانلارنىڭ ئاخىرەتلىك ئىشلىرىنى مۇۋاپىق ھەل قىلىش، ۋەقەنىڭ سەۋەبىنى تەكشۈرۈپ ئېنىقلاش، تۆمۈريولنىڭ نورمال ترانسپورت تەرتىپىنى تېزدىن ئەسلىگە كەلتۈرۈشنى تەلەپ قىلدى.
پارتىيە مەركىزىي كومىتېتى، گوۋۇيۈەننىڭ ھاۋالىسى بىلەن، ج ك پ مەركىزىي كومىتېت سىياسىي بيۇروسىنىڭ ئەزاسى، گوۋۇيۈەننىڭ مۇئاۋىن زۇڭلىسى جاڭ دېجياڭ 28 - ئاپرېل چۈشتىن بۇرۇن ھادىسە يۈز بەرگەن نەق مەيدانىغا دەرھال بېرىپ، قۇتقۇزۇش ۋە ئاخىرەتلىك ئىشلارنى بىر تەرەپ قىلىش خىزمىتىگە يېتەكچىلىك قىلدى ھەم دوختۇرخانىغا بېرىپ، يارىلانغانلارنى يوقلاپ، قازا قىلغانلارغا تەزىيە بىلدۈرۈپ، تالاپەتكە ئۇچرىغانلارنىڭ ئائىلە تاۋابىئاتلىرىغا پارتىيە مەركىزىي كومىتېتى، گوۋۇيۈەننىڭ سەمىمىي غەمخورلۇقىنى يەتكۈزدى. جاڭ دېجياڭ تۆمۈريول مىنىستىرلىكى، شەندۇڭ ئۆلكىسى ۋە ئالاقىدار تەرەپلەردىن مەركىزىي كومىتېتنىڭ تەلىپى بويىچە، يارىلانغانلارنى قۇتقۇزۇش، نەق مەيداننى تازىلاش، ئەسلىھەلەرنى جىددىي رېمونت قىلىش خىزمەتلىرىنى پۈتۈن كۈچ بىلەن ياخشى ئىشلەپ، تۆمۈريول ترانسپورتىنى ئەڭ قىسقا ۋاقىت ئىچىدە نورماللاشتۇرۇشقا تىرىشىشنى تەلەپ قىلدى.
دەسلەپكى تەكشۈرۈشكە قارىغاندا، بۇ مەسئۇلىيەت ھادىسىسى بولۇپ، تاشقى تېررورلۇق ھۇجۇمى ئېھتىماللىقىنى ئاساسىي جەھەتتىن نەزەردىن ساقىت قىلىشقا بولىدىكەن، ھادىسىنىڭ سەۋەبى تەكشۈرۈلۈۋېتىپتۇ.
