ھەر يىلى 3 – ، 4 – ئاي ئادەم ئىشلىتىشنىڭ باس – باس مەزگىلى. بەزى قانۇنسىز ئۇنسۇرلار كىشىلەرنىڭ خىزمەتكە تەشنا بولۇۋاتقانلىقىدىن پايدىلىنىپ، ئىشقا تونۇشتۇرۇشنى باھانە قىلىپ، ھەرخىل ئالدامچىلىق بىلەن شۇغۇللانماقتا. </p>
     ساۋەن ناھىيىلىك ج خ ئىدارىسى ئىقتىسادىي رازۋېدكا چوڭ ئەترىتى خىزمەتچىسىنىڭ تونۇشتۇرۇشىچە، ئالدامچىلار ئاساسلىقى تۆۋەندىكىدەك نەيرەڭلەرنى ئىشلىتىدىكەن:
     بىرىنچى، ھەرخىل گېزىت – ژۇرنال ۋە ئالاقە تورىدا يۇقىرى ئىش ھەققى بىلەن خىزمەتكە تەكلىپ قىلىش ئېلانى بېرىپ، خىزمەت ئىزدىگۈچىلەرنى قىزىقتۇرۇپ، ئىش توختامىدا قەستەن توزاق قۇرۇش. ئىشلەشكە ئىنتىزار بولغانلار ھەمىشە توختام ماددىلىرىغا تەپسىلىي قارىمايلا ئىمزا قويىدۇ. ئالايلۇق، توختامدا ‹‹شۇ كۈنى ئىشقا ئورۇنلاشتۇرۇلىدۇ، بىر نەچچە قېتىم يۈزتۇرا ئىمتىھان ئېلىش پۇرسىتى بار›› ، ‹‹ئەگەر خىزمەتكە تەكلىپ قىلىنغۇچى تەشەببۇسكارلىق بىلەن توختامنى ئەمەلدىن قالدۇرۇشنى ئوتتۇرىغا قويسا، كېلىشىم بويىچە %10 %15 پۇلى قايتۇرۇپ بېرىلىدۇ›› ۋەھاكازالار. ئاتالمىش ‹‹يۈزتۇرا ئىمتىھان››دىن ئۆتەلمىگەندىن كېيىن، خىزمەتكە تەكلىپ قىلىنغۇچى توختامنى ئەمەلدىن قالدۇرۇشنى ئوتتۇرىغا قويسا، تاپشۇرغان پۇلنى تولۇق قايتۇرۇۋالالمايدۇ. 

     ئىككىنچى، ھەرخىل نام بىلەن ئالدامچىلىق قىلىش. قارا نىيەت ۋاسىتىچىلەر يۇقىرى ئىش ھەققى بىلەن خىزمەتكە تەكلىپ قىلىش  ئارقىلىق خىزمەت ئىزدىگۈچىلەرنى ئالداپ يۈزتۇرا ئىمتىھان بەرگۈزگەندىن كېيىن، ھەمىشە كىيىم  – كېچەك ھەققى، سالامەتلىكنى تەكشۈرتۈش ھەققى، تەربىيىلەش ھەققى قاتارلىق ناملار بىلەن خىزمەتكە تەكلىپ قىلىنغۇچىلاردىن ھەق ئالىدۇ، لېكىن تالون كەسكەندە تامغا باسمايدۇ، تەكلىپ قىلىنغۇچىلارنىمۇ خىزمەتكە ئورۇنلاشتۇرمايدۇ. خىزمەتكە تەكلىپ قىلىنغۇچىلار ئالدانغانلىقىنى سېزىپ، پۇلىنى قايتۇرۇۋالماقچى بولغاندا، قانۇنسىز ئۇنسۇرلار تالوننى يىغىپ تامغا بېسىشنى باھانە قىلىپ تالون ۋە توختامنى ئېلىۋېلىپ قېچىپ كېتىدۇ. 

     ئۈچىنچى، قانۇنسىز تىل بىرىكتۈرۈۋېلىپ، بىرى ۋاسىتىچى شىركەت، يەنە بىرى ئادەم ئىشلەتكۈچى ئورۇن بولۇۋېلىش. ئاتالمىش ‹‹ۋاسىتىچى شىركەت›› خىزمەت ئىزدىگۈچىلەردىن رەسمىيەت ھەققى ئالغاندىن كېيىن، ئۇلاردىن ‹‹ئادەم ئىشلەتكۈچى ئورۇن›› غا بېرىپ يۈزتۇرا ئىمتىھان بېرىشىنى تەلەپ قىلىدۇ، ‹‹ئادەم ئىشلەتكۈچى ئورۇن›› ھەرخىل باھانە – سەۋەب كۆرسىتىپ، تەكلىپ قىلىنغۇچىنى لاياقەتسىز دەپ ئىشقا قوبۇل قىلمايدۇ ياكى قاتتىق شەرتلەرنى قويۇپ، تەكلىپ قىلىنغۇچىنى ئۆزلۈكىدىن ۋاز كېچىشكە قىستايدۇ. تەكلىپ قىلىنغۇچى ‹‹ۋاسىتىچى شىركەت›› تىن پۇلىنى قايتۇرۇپ بېرىشىنى تەلەپ قىلغاندا، قانۇنسىز ئۇنسۇرلار ‹‹تەكلىپ قىلىنغۇچىنىڭ سەۋەبى تۈپەيلىدىن ئادەم ئىشلەتكۈچى ئورۇن تەرىپىدىن قوبۇل قىلىنمىدى›› دېگەن باھانە بىلەن پۇلىنى قايتۇرۇپ بەرمەيدۇ